GUDIYADA FARSMADA SHIRKA ELDORET OO HAWSHOODA SOO GABA GABEYNAYA BISHAN.

Nairobi, January 14th 2002 (IRIN) Gudiyada Farsamada ee shirka Eldoret oo ka shaqeynayay arrimo muhiim u ah khilaafka ka taagan Soomaaliya ayaa soo gabagabeynaya hawlahooda bishan sida uu raga wararka fidiya u sheegay maanta (Talaado) Ergayga gaar ka ah ee Kenya u qaabilsan arrimaha Somalia Elijah Mwangale, taasi oo micnaheedu tahay ayuu yiri Mwangale in wejiga sadexaad ee wada hadalka oo ah qeybta awood qeybsiga ay bilaabato horaanta bisha Febraayo. Mwangale Waa Gudoomiyaha Gudiga Farsamada Urur Goboleedka IGAD u qaabilsan shirka magaalada dhinaca galbeedka dalka Kenya ku taal ee Eldoret uga furmay Kooxaha Soomaalida 15 Bishii October ee sanadkii hore. Shirka ayaa IGAD waxa ay kala kulantay dhibaatooyin badan oo ku saabsan tirada ergooyinka ka qeybgalaya, waxaana Hogaamiyeyaasha Soomaalida qaar ka tirsan oo todobaadkii hore la kulmay Wasiirka Cusub ee Arrimaha dibeda Kenya Mr. Kalonzo Masyoka ay ku eedeeyeen Mwangale inuu shirka sidii uu doono u maamulayo. Mwangale ayaa waxaa magacaabay Dawladii hore ee dalka Kenya ee awooda lagala wareegay kadib doorashooyinkii dhacay Bishii December ee sanadkii hore. Mar la weydiiyey Mwangale inuu is casilayo waxa uu saxaafada u sheegay in hadii ay dhacdo sabab uu isku casilo, uu is casilayo, isagoo sii raaciyey “sababtoo ah waxaan ahay nin qadarin mudan” Mwangale waxa uu sheegay inay arinta dhabta ahi tahay inay jiraan dhibaatooyin badan oo hor taagan shirka, “mid waxa ay ahayd sidii lagu sameyn lahaa gudiyadan Farsamada iyo sidii ay si mideysan ugu wada shaqeyn lahaayeen Wadamada Jabuuti, Kenya, iyo Ethiopia. Mwangale waxa uu sheegay inuusan ilaa iyo hada heynin wax astaan ah oo Dawlada cusub ee Kenya ay ku dooneyso in isaga ay kaga tuurto xilka, “arinta ugu muhiimsan waa in shirka horey loo sii wado” ayuu yiri, isagoo intaa sii raaciyey “waa arin aad u dhib badan, wax kasta oo aan qabto iyo wax kasta oo uu sameeyo qofka Gudoomiye ka noqda hadii aan anigu ka tago meesha isku dhibaato ayaanu la kulmeynaa,” laakiin waxaa muhiim ah in shirka weli aanu wadno” ayuu yiri Mwangale oo ka hadlayay markaasi Shir Jaraa’id oo ku qabtay Xaruunta Wasaarada Arrimaha dibeda ee Magaalada Nairobi DHAMAAD